Sa wakas tayo nag-umpisa
Huli ninyong magkasama'y una nating dalawa
Ako ang tauhan sa sumunod na kabanata
Hindi sinadyang pumangalawa sa kuwento ng iba
Sabi ng iba'y mali na tayo'y mag-kasama.
Hindi dapat ako ang yakap mo sa tuwina,
'Di tamang kamay ko ang humahaplos sa'yong mukha.
Kailan nga ba mali na magmahal ng iba?
Paano kung hindi ka na masaya sa kanya?
Di ba't di ka naman titingin sa iba
Kung tunay ngang mahal mo pa siya?
Sa kuwento'ng ito, sino nga ba ang biktima?
Ako raw ang higit na dapat magparaya,
Mali nga bang ako ri'y maging maligaya?
Paano ako na tunay ring nagmamahal?
Sa inyo nga bang dalawa'y ako'y sagabal?
Dapat nga bang ito'y ipaglaban pa?
O umpisa pa lang ng laban ako'y talo na...
Ako'y hahakbang nang papalayo.
Sa wakas, magpaparaya na ang wasak kong puso.
